係mum近年迷上嘅開心果味蛋糕～去咗嫲嫲屋企慶祝。順便紀錄下同mum嘅關係。
【 TLDR； 】
內心錫佢嘅 佢內心都錫我嘅，雖然佢個人真心麻煩，但理性時都會明白主要係佢唔識表達自己，諗返起細個時佢都好錫我，好希望有天可以同佢關係變好。下文超極長、怨氣重，有興趣先繼續睇。（更新中⋯⋯）
p.s. 順便會記錄埋阿爸以前啲衰嘢 T^T（不過佢近年變得正常咗好多👍🏻）
＊＊＊
【 講下佢嘅人設 】
坦白講，喺我印象中係負面佔多：
- 家庭主婦
- 公認特質：性格固執、長氣、中等偏嚴重潔癖、強迫症、控制欲強
- 我個人分析佢嘅特質：不善於表達情感、成日會掛住老公、寂寞、愛面子
- 最令我反感：一味淨係識得講讀書、成日好X遲煮飯、講野好大聲好高Key耳都嗚、成日偷睇偷翻我啲野然後周圍同親戚講
- 嬲佢嘅野 實際編：唔俾零用錢、唔帶我地去旅行、成日喺屋企做啲阻頭阻勢嘅事（分析：其實係想同我有互動／刷存在感）、 成日生人霸死地霸住廁所同廚房（打呢篇文現時清晨02:12，突然急屎，發現佢先沖緊涼⋯）
- 嬲佢嘅野 心理編：成日羨慕人哋啲仔女而漠視自己仔女嘅成就（或者佢根本就唔知道我地嘅成就＝ 欠缺關心和理解）、怕事 唔幫仔女出頭、少少事就Lar埋口面 我玻璃心架好冇
- 害怕：昆蟲、狗（not any more I guess?）
- 興趣：睇TVB、唱歌（胖虎啲frd ww）
- 愛吃：開心果味／櫻花味嘅所有野
- 喜歡：迪士尼、Hello Kitty、城堡及所有grand嘅野
- 細個鐘意睇嘅卡通片： 仙巴歷險記、義犬報恩
- 優點：大部分時間樂觀、 抗壓能力較強、記性幾好、有為自己嘅目標（望子成龍）而摶盡
- 可愛：見到童畫類事物會開心得像小公主、電話鈴聲set到人人唔同 而且部份係細聲到聽唔到、SMS鈴聲好鬼長又好大聲（小小世界成首歌變奏重複3分鐘版 以及O Christmas Tree）
＊＊＊
【 On9 Moments 】
On9 Moment一：人辭職佢辭職
真心係好撚On9。總之佢辭職嘅主要原因就係覺得我初中嘅時候好跩，然後覺得我已經冇得救，佢唔想細佬妹步我後塵， 而且見到我阿姨都辭咗職去照顧我表弟，佢就想學人辭工去全職教小朋友。
第一On9係，佢地覺得我跩嘅定義就係冇24小時＜🤮讀書🤮＞、 放學參加學會五點幾先返屋企（WTF）。最癲係，我係肥底，初中時更係個不折不扣嘅肥仔。為咗冧女，我晚晚跑上去屋企附近山上嘅運動場再跑5000m再跑返屋，之後超fit💪🏻🔥；佢地唔單止從來冇嘗試去了解或者去欣賞我嘅進步， 更加係癲到覺得我係吸左毒個人「消瘦」咗好多⋯⋯ 真心乜鳩呀⋯⋯ 兩個都係做護士嘅， 竟然唔識得分我有冇吸毒，有冇撚病？
第二On9係， 阿姨個老公即係姨丈一個嘅人工都多過我阿爸阿媽兩個加埋，阿媽唔撈 咁屋企就要乜都慳慳慳。痴線煮埋幾粒牛丸撈飯又當一餐， 一陣話電費貴八月先准開冷氣熱到出汁。 大佬點解要搞到咁窮呢？ 其實我最嬲都係佢地對仔女就孤寒， 俾啲保險佬呃就闊佬，一年俾成十鳩幾萬去供份死撚咗先拎得嘅人壽保，由我幾歲起供左廿鳩幾年，到2023年仲供緊。真心好大怨氣！ 一年如果有10幾萬閒錢，不如試吓帶下我哋去旅行先啦？ 或者試吓買啲好少少嘅餸菜？呢啲係我出咗黎做野之後諗返越諗越嬲嘅，以前都仲係傻更更覺得父母搵錢辛苦所以刻苦節儉係應份。下面心碎Moment會有講到有關要呀媽搵工發生嘅心碎事。
而最On9係，佢辭咗職照顧小朋友嘅方法，就係日日講由朝到晚360度全天候7X24 DLLM＜🤮讀書🤮＞＜🤮讀書🤮＞＜🤮讀書🤮＞， 而唔係花多啲心機去了解仔女嘅心境同需要。 然後變得越嚟越偏激，阿爸就越嚟越以OT形式搵多啲錢， 佢就更加越嚟越掛住個老公。
On9 Moment二：老師DLLM
唉屌呢單野。（其實老豆係主兇🤣）
On9 Moment三：零用錢，0用錢
乜錢都唔俾，極度孤寒。大個人分析返其實主要係為咗滿足佢嘅控制慾，佢諗住我地冇錢就唔會出街會乖乖地喺屋企＜🤮讀書🤮＞。3點幾放學，5點返到屋企。「 （發飆的聲音）做乜咁晏先返到？！？！？」喂大佬呀，我（沒氣了）
以佢地嘅講法就係，我地有咩需要開聲就得，佢地自然會買俾我地，所以唔使零用錢。事實就係，乜Q都要求，even只係買本《CO-CO！》都要跪求，仲要求極都冇，又話要＜🤮讀書🤮＞先； 幾個月先出去同朋友次食飯要錢又話咩＜🤮讀書🤮＞又話已經同佢食過就唔使再食。我今日仲有咁多朋友可謂神跡。
然後有個好仆街嘅概念就係啲嘢係佢哋出錢買， 所以就算已經送咗俾我哋，物品其實都係屬於佢哋， 佢哋係有權隨意沒收或者偷睇甚至棄置（下面有心碎事件）。好嘔心， 成日用呢啲藉口去合理化自己啲自私行為。
妹妹有我呢個哥算佢幸福🥰 佢好日都唔求，P.6時求媽買個cinnamoroll畢業公仔求咗好耐都無果，我慳埋慳埋啲飯錢買咗俾佢🥺 諗返起嗰排雖然辛苦，但係見到妹妹好開心咁拎住隻畢業公仔同啲朋友仔影相，嗰下真係開心感動到想喊🌸
On9 Moment三：我15歲時佢話我5歲扭計
乜9⋯⋯ F.5時同媽講想試下一家搭飛機去旅行，佢用埋啲9唔搭8嘅藉口去掩飾佢嘅貧窮同埋懶惰：「你記唔記得你五歲嘅時候帶你出街呀，你呀，喺條街行扭計話要返屋企呀？」真心無言咗。其實你有困難可以直接講。
爸：「我地呀，以前呀， 讀書嘅時候邊有話去旅行㗎？ 去一次旅行呀，好巴閉㗎， 我同你阿媽呀，都係廿幾歲出黎做野呀，先 自己儲錢去旅行呀。」
拜託🙏🏻 成日將以前封建時代把尺度落去喺現今社會生存緊嘅我地度。 我都唔想再多解釋，你自己諗吓where is the 道理。
＊＊＊
【 心碎Moments 】
心碎Moment一：偷睇日記
心碎Moment二：曲解我想佢打工搵錢俾我洗
心碎Moment三：Dum哂⋯☹️（已經眼濕濕）
心碎Moment四：控制唔到自己嘅控制慾
心碎Moment五：鳩羨慕人鳩踩自己
Around 2013/14年， 無啦啦話阿爸阿媽啲舊同事搞聚會， 去咗某個Uncle面積稍大屋企， 部份同事都有帶埋自己嘅仔女， 大概有三四家人。其實就咁， 我都覺得啲Uncle Auntie 對佢哋自己嘅仔女過分褒獎咗， 毫無掩飾自己對仔女小小成就嘅讚揚， 我覺得可以謙虛返少少。
但係呢姐係呢， 我阿媽唔係謙虛咁簡單， 係瘋狂羨慕人哋嘅仔女同埋亂鳩咁踩自己仔女。例如覺得人地有個仔讀佢最崇拜嘅《Med Dee》科就即刻想過去含😅 又聽到人地識游水就心心眼😅 大佬呀大大個喇沙泳隊兼持牌救生員兼持牌游泳教練喺佢面前😅 有個Auntie就話自己個仔識得自己砌電腦佢又想過去含😅 其實呢我係電子工程師＋軟件工程師😅 8歲時 電腦仲未話好發達時已經寫咗個有過千會員嘅網站😅（請問有誰有嘗試知道？）
都唔緊要， 但係聽到人哋個19歲嘅女會煮飯同抹地，佢嘅反射動作係：「咁叻！好叻女喎！！我嗰幾嗰吖！ 剩係識得吖食！乜都唔識做吖！」😅😅😅⋯⋯ 其實，係，，， 佢從來唔俾人入廚房，又唔俾人煮嘢食又唔俾人做任何嘢，因為佢要控制晒屋企嘅所有嘢😅😅😅 你估我好想等到夜晚22:XX 先有晚餐食？？？ 我唔想自己煮飯？？？（註： 我坐言起行！ 而家每日都會喺廳用電磁爐烹飪佳餚www）
我唔知細佬妹點諗， 我作為大哥 唔單止覺得自己受到委屈，更加係覺得平時聽晒阿媽話嘅細佬妹比阿媽咁樣喺啲叔父面前失實指控， 我真係為佢地而嬲到咬牙切齒。
心碎Moment END GAME：讀書讀書讀書剩撚係識讀書
仆街如果係靠＜🤮讀書🤮＞就有好生活就能夠出人頭地咁個個都財務自由咗啦！睇下我？咪就係一個讀得成書又冇成就嘅人版囉（in their sense）：冇專業執照、冇車冇樓、冇穩定工作。其實過好生活唔係在於讀唔讀書囉真心，係真心。我叫做係讀得成書，叫做打過中上薪酬嘅工，用過來人嘅身份講，好嘅生活其實一直都喺身邊，只係被＜🤮讀書🤮＞同打工埋沒咗。
明嘅，華人社會就係着重＜🤮讀書🤮＞。重點係，就算 假設 如果 ＜🤮讀書🤮＞真係好重要，都唔使由朝到晚都講住＜🤮讀書🤮＞架？係去到一個好極端難以溝通嘅竟界。例如：
- 「好肚餓啊⋯」「你讀好書啦咩？」
- 「不如出去行下」「行咩行＜🤮讀書🤮＞啦」
- 「媽我水運會拎咗獎牌！」「吾⋯咁返去好＜🤮讀書🤮＞啦」
Jesus，真係9唔搭8。我地嘅溝通好似就係咁而一直惡化。
p.s. 雖然我極討厭聽到我媽講＜🤮讀書🤮＞，但我係好鍾意自己學新野～網上學感興趣嘅野、能自我增值嘅野🌝。
「曾付出 幾多心跳
來換取 一堆堆的發票
人值得 命中減少幾秒 多買一隻錶
秒速捉得緊了 而皮膚竟偷偷鬆了
為何用到盡了 至知那樣緊要」– 《陀飛輪》歌詞
＊＊＊
我要求佢承認自己嘅過錯及道歉😡 並且承諾作出改變😡😡😡
＊＊＊
【 感動Moments 】
感動Moment一：喇沙
父母本身都唔係咩讀書人。佢地，特別係媽，用盡一切可能嘅辦法幫我入到全香港最好嘅學校—喇沙。仲記得媽曾經講過佢人生之中第一次見到天上邊真正嘅彩虹，咁啱就係我放榜放到喇沙嗰一日。
點講呢，係矛盾嘅，係好討厭佢講讀書，但喺香港冇讀好書就冇乜機會入到好學校。喇沙對我黎講真係好重要，重要到我今時今日有嘅人氣、自信、氣焰、人品、實力等等，好大部都係黎自喇沙。講到話我入到好大學，我成日都話好在我一早反叛唔聽阿媽教先入到🤣 係事實黎嘅。靠係靠喺母校OLF學會中遇到好師兄教我讀書，同埋自己日以繼夜去自修先入到中大（唔好笑我啦本身讀書係麻麻呀嘛）。中大又係好學校，真心，another story。
咁講到尾，就係媽為我鋪咗呢條咁好嘅路，先有今日將會成功嘅我。哎⋯諗返起，佢本來就出自一個好唔容易嘅貧窮家庭，佢更加唔係識教人讀書嘅人，或許佢就係知道自己能力不足，先竭盡所能去幫我入到好學校。
我都唔識講，百感交集。每每諗到冇喇沙就冇我嘅成就，而冇媽我都唔喺喇沙，就。
感動Moment二：GBA
感動Moment三：SARS 2003
2003 SARS高峰期嘅一個夜晚，我唔舒服。其實嗰時都唔明咩SARS，對我黎講嗰晚係普通唔舒服，我細個本來就潺底， 周不時都病下。
爸媽都返P更，夜晚22:XX返到屋企。我就同佢地講我唔舒服。
- 爸：「唉⋯⋯⋯⋯ 我都估到會中招架啦⋯⋯ 聰仔⋯⋯放心啦⋯⋯爸爸媽媽會一直陪住你⋯⋯⋯⋯」
- （我心涼咗半截，又唔係第一次病，做乜突然同我講遺言）
- 我：「⋯⋯😱😨😰」（突然喉嚨覺得好緊好似抖唔到氣， 心跳好沉重好大力）
- 媽：「唏！好少事咋嘛！ 瞓醒覺就冇事㗎喇媽咪攬住你瞓啦～」
- 我：「😭🥰🥺⋯⋯」
umm 過兩日真係乜事都冇。唞唔到氣嗰下應該係俾阿爸嚇親😅 喺呢啲緊要關頭都係阿媽有安全感🌸
感動Moment四：偷睇返細個啲錄影
冇得再睇架啦，雖然只睇過一次但刻骨銘心，會記得細個時佢係有幾錫我，係喺幾餅舊式錄影帶度睇到嘅。仲記得F.2有夜山長水遠去婆婆屋企食間飯，佢地好似話食完會喺嗰度過夜一晚，總之氣氛同心情都好差，所以我21:xx頂唔順自己走先搭車返屋企。
23:xx，陰風陣陣，好似第一次得自己一個喺屋，仲要夜媽媽，其實少驚少凍又寂寞。諗起雜物房有個錄影帶櫃 上面係有啲兒時片段嘅好似，就過去check下。見到《心愛小健聰》、《健聰朗聰》 （其他忘了名字），就攞咗幾盒出去出面廳錄影機睇。
見到好多細個時佢同我地傾計又攬住我地嘅場面，好歡樂好似一個我心目中嘅理想家庭，睇到喊咗成晚。前幾年屋企大裝修嘅時候好似被掉哂lu。哎唔再講了。畫面有印在腦中就ok la。
＊＊＊
【 內心最想同佢講嘅說話 】
多謝、對唔住、我愛你。
好多謝你拚命幫我入到間我一輩子引以為傲嘅好學校。對唔住呢刻未夠錢俾你享清福，見你皮膚偷偷鬆了其實我都好急，好想可以大家一齊財務自由，多啲一齊出去玩。我地都對大家好啲啦好嘛？
